नेपाल भारतविच विजुली आयातमा आज सम्झौता हुने

तामाङ न्यूज,२०६५ असोज ८ बुधबार

नेपाल र भारतविच ६० मेगावट विजुली आयात सम्बन्धि सम्झौतामा आज हस्ताक्षर हुने भएको छ । तेस्रो उर्जा सम्मेलनमा सहभागी हुन आउनु भएका भारतका बाणिज्य तथा आपूर्ति राज्यमन्त्री जयराम रामेशले भारतका तर्फाट सम्झौता गर्नुहुनेछ ।
यसैविच तेस्रो उर्जा सम्मेलनमा आज उर्जाको बजार, जलस्रोत परियोजनाको आर्थिक सामाजिक पक्ष, नवीकरणीय उर्जाका स्रोत, आवश्यकता र फाइदा एवम् उर्जा सुरक्षाका विषयमा कार्यपत्र प्रस्तुत गरिँदै छ ।
चार सत्रमा बाँडिएको आजको कार्यक्रममा ११ जना जलस्रोत विदले आफ्ना कार्यपत्र प्रस्तुत गर्नुहुने छ ।
हिजोदेखि सुरु भएको सम्मेलनमा उठेका विषयमा छलफलपछि आजै सम्मेलनको समापन गरिने छ । सम्मेलनको आयोजना स्वतन्त्र उर्जा उत्पादकहरुको संस्था -इपान), भारतीय पावर टे्रडिङ् कम्पनी -पीटीसी), र नेपाल भारत चेम्बर अफ कमर्शले संयुक्त रुपमा आयोजना गरेका हुन् ।

प्रधानमन्त्री दाहाल र बुसबीच भेटवार्ता

तामाङ न्यूज, २०६५ असोज ८ बुधबार

संयुक्त राष्ट्र संघको महासभामा भाग लिन अमेरिका पुगेका प्रधानमन्त्री पुष्पकमल दाहाल प्रचण्डले अमेरिकी राष्ट्रपतिसँग १० मिनेट कुरा गरेका छन् ।
प्रधानमन्त्री पुष्पकमल दाहाल 'प्रचण्ड' ले अमेरिकी राष्ट्रपति जर्ज डब्लू. बुससँग भेट गरेका छन् । प्रधानमन्त्री निकट श्रोतले बताए अनुसार, अमेरिकी राष्ट्रपति बुस तथा उनको पत्नी लौरा बुसले संयुक्त राष्ट्र संघ महासभामा भाग लिन पुगेका बिभिन्न मुलुकका प्रतिनिधि प्रमुखहरूको सम्मानमा असोज ६ गते राति न्यूयोर्कमा स्वागतमा समारोह गरेका बेला नेपाली प्रधानमन्त्रीको उनीहरुसँग भेट भएको हो । दुई नेताबीचको भेट करिव १० मिनेट लामो भएको पनि श्रोतले उल्लेख गर्‍यो । भेटमा प्रधानमन्त्री प्रचण्डले आफूहरु भर्खरै क्रान्तिबाट सत्तामा आएकाले दुई देशबीचको सम्बन्ध सुमधुर बनाउन अमेरिकी पहल आवश्यक रहेको बताएका राष्ट्रिय समाचार समितिले जनाएको छ ।

अर्को जनयुद्ध हुने यादबको चेतावनी

तामाङ न्यूज, २०६५ असोज ७ मंगलबार

सिराहा मिर्चैयामा गरिवहरुलाई घर बनाउन नदिए त्यहीँबाट अर्को जनयुद्ध सुरु हुने माओवादी नेता मात्रृका यादवले चेतावनी दिएका छन् ।
भूमिसुधार मन्त्रीबाट राजीनामा दिएका माओवादी केन्द्रीय सदस्य मातृका यादवले सिराहा मिर्चैया घटनाले धेरैलाई नाङ्गेझार पार्ने दावी गरेका छन् । असोज ७ गते जनकपुरमा माओवादीको स्थानीय कमिटीद्वारा आयोजित पत्रकार सम्मेलनमा बोल्दै यादवले भने , 'मिर्चैया घटनाले धेरैको चरित्र प्रष्ट पारे पनि उनीहरुलाई नाङ्गेझार पार्न बाँकी छ, त्यही अभियानमा म लागेको छु ।' यादवले कसको चरित्र स्पष्ट पारेको तथा कसलाई नाङ्गेझार पार्न आफू लागेको भन्ने भने पत्रकार सम्मेलनमा खोलेनन् । कार्यक्रममा माओवादीका धनुषा, महोत्तरी, सिराहा र सप्तरी जिल्ला इन्चार्जहरुको उपस्थिति थियो ।
यादवले मिर्चैयामामा आफूले कब्जा गरेको ब्यक्तिगत जमिनमा गरिवहरुको घर बनेरै छाड्ने पनि दावी गरे । यादवले गरिवको घर बन्दा कसैले अवरोध पुर्‍याए त्यही ठाउँ जनयुद्धको अर्को केन्द्र बन्ने उल्लेख गरे ।
यता, माओवादी भातृ संगठन मधेसी राष्ट्रिय मुक्ति मोर्चाले भू-माफिया बिरुद्ध असोज ८ गतेदेखि धनुषा, महोत्तरी, सर्लाही, सिराहा, सप्तरी र सुनसरीमा आन्दोलनको घोषणा गरेको छ । आन्दोलनको कार्यक्रम अनुसार, असोज ८ गते ती ६ जिल्लाका जिल्ला प्रशासन कार्यालयमा एक घण्टा कालोझण्डा देखाउदै धर्ना दिइनेछ ।

बजेटबारे छलफल हुँदै

आगामी आर्थिक वर्षको बजेटबारे असोज २ गते २५ दलबीच छलफल हुने भएको छ । सरकारले ल्याउन लागेको आगामी आर्थिक वर्षको बजेटबारे २५ दलबीच छलफल हुने भएको छ । असोज ३ गते बिधायिका संसदको बैठकमा पेश हुने बजेटबारे असोज २ गते अर्थमन्त्रालयमा बिहान ११ बजेदेखि २५ दलबीच छलफल हुनलागेको जानकारी संविधानसभाध्यक्ष सुवास नेम्वाङले दिएका हुन् । संसदमा पेश हुनुअघि बजेट गोप्य राख्ने प्रचलन रहेकोमा बजेटबारे अर्थमन्त्री डा. बाबुराम भट्टराईले के कति जानकारी दिनेछन् भन्नेचाहिँ हेर्न बाँकि छ ।

अझै निर्णय नभएको

संविधानसभा चुनावबाट सबैभन्दा ठूलो दल बनेको माओवादीको नेतृत्वमा बन्ने सरकारको नेतृत्व कुन नेताले गर्ने भन्नेबारे अझै निर्णय नभएको माओवादीका एक जना वरिष्ठ नेताले बताएका छन् । यसअघि माओवादी अध्यक्ष प्रचण्डले आफ्नै नेतृत्वमा सरकार बन्ने सार्वजनिक घोषणा गरेका थिए ।
माओवादीको केन्द्रीय सचिवाल सदस्य तथा अर्घाखाँचीबाट संविधानसभा सदस्यमा निर्वाचित टोपबहादुर रायमाझीले हिमालखबर डट कमसँग कुरा गर्दै पार्टी अध्यक्ष प्रचण्ड राष्ट्र प्रमुख बन्ने निश्चित भए पनि सरकारको नेतृत्व कसले गर्नेबारे पार्टीले अझै निर्णय गर्न बाँकि रहेको उल्लेख गरे । 'हाम्रो नेतृत्वमा सरकार बन्ने, त्यसमा अन्य दललाई सामेल गराउने, संविधानसभाको पहिलो बैठकबाट राजतन्त्रको अन्त्य गर्ने स्पष्ट भइसकेको छ तथा अध्यक्ष प्रचण्ड राष्ट्रप्रमुख बन्ने पनि निश्चित छ' पार्टको रणनीति खुलाउदै रायमाझीले भने, 'सरकारको नेतृत्व कसले गर्ने भन्नेबारे भने पार्टी केन्द्रीय समितिको बैठकको निर्णय पछि मात्र निश्चित हुनेछ ।' संविधानसभा चुनावमा माओवादीले अध्यक्ष प्रचण्डलाई भावी राष्ट्रपतिका रुपमा प्रचार गरेको थियो भने अर्का नेता डा. बाबुराम भट्टराईलाई सरकार प्रमुख तथा प्रधानमन्त्रीका रुपमा हेरिएको थियो ।

राजनीतिक भेटघाट तीव्र

माओवादी अध्यक्ष प्रचण्डले राजनीतिक भेटघाट तीव्र पारेका छन् । प्रचण्डले बिहीबार कांग्रेस र एमालेका नेतालाई आगामी सरकारमा सहभागी हुन प्रस्ताव पनि गरेका छन् । वामबुद्धिजीवीसँगको अन्तर्त्रिmयामा उनले माओवादीले नेतृत्व गर्ने आगामी सरकारका सम्भावित चुनौतीबारे छलफल गरेका छन् । प्रचण्डले कांग्रेस, एमालेलगायत दलबीच हार्दिकताका साथ आगामी सत्ता बाँडफाँड हुने बताएका छन् । उनले जनताको जनादेशअनुसार सरकारको नेतृत्व परिवर्तन भए पनि संयुक्त सरकार गठन गर्न माओवादीले पहल गरिरहेकोसमेत उल्लेख गरे । 'आगामी सरकार अनिर्णयको बन्दी हुने छैन्,' वामबुद्धिजीवीसँग बुधबार भएको तीनघन्टा लामो अन्तक्रिर्यामा प्रचण्डले भने, 'शक्ति सन्तुलनको स्थिति सहमतीय हुनुपर्छ भन्ने हाम्रो मान्यता हो ।' सातदलीय गठबन्धन तथा चुनावी जनादेशप्राप्त अन्य दलबीच सहकार्य र सहअस्तित्वका लागि माओवादी तयार रहेको पनि प्रचण्डको भनाइ थियो । 'शान्तिप्रक्रिया अघि बढाउन र नयाँ संविधान निर्माण गर्न दलबीच विगतमा जस्तै सहकार्य आवश्यक छ,' प्रचण्डले भने, 'हाम्रा अगाडि रहेका चुनौतीको सामना पनि सामूहिक प्रयत्नबाट मात्रै हल गर्न सकिन्छ ।' चुनावमा हारजित महत्त्वपूर्ण नभएको बताउँदै प्रचण्डले सबै दलबीच सहकार्यको आवश्यकता थप महसुस भएको उल्लख गरे । अन्तर्राष्ट्रिय समुदाय माओवादीप्रति विश्वस्त हुन नसकेको भन्दै प्रचण्डले त्यसका लागि पनि दलबीच एकता र सहकार्य आवश्यक रहेको बताए । संविधान निर्माण गर्न दलहरू मिलेर नगए प्रतिक्रान्तिको खतरा आउन सक्ने प्रचण्डले बताए । 'त्यसप्रति हामी सचेत छौँ,' उनको भनाइ थियो ।प्रचण्डले मधेसी दलसँग पनि राजनीतिक छलफल सुरु गरेको जानकारी दिएका थिए । 'मधेसी नेतासँग पनि मैले कुरा सुरु गरेँ,' प्रचण्डले भने, 'उपेन्द्र यादवसँग पनि छलफल सुरु गरेको छु । अहिलेसम्म सकारात्मक स्थिति बनिराखेको छ ।' माओवादीको नेतृत्वमा गठन हुने 'संयुक्त सरकार' को पहिलो प्राथमिकता संवैधानिक संरचना निर्माण गर्ने भएको बताउँदै उनले भने, 'दैनिक जनजीवनमा आइपर्ने समस्यालाई पनि हल गर्नुपर्छ, तर मुख्य प्राथमिकता यो हुने छैन ।' बिहीबार अध्यक्ष प्रचण्ड र वरिष्ठ नेता डा. बाबुराम भट्टराईले एमाले नेता माधवकुमार नेपाल र गृहमन्त्री कृष्णप्रसाद सिटौलासँग भावी सरकार गठनबारे छलफल गरेका थिए । 'प्रधानमन्त्रीले पनि माओवादीको नेतृत्वमा बन्ने सरकारलाई सहयोग गर्न तयार छु भन्नुभएको छ,' प्रचण्डले बुद्धिजीवीमाझ भने, 'परामर्श भइरहेको छ ।' प्रधानमन्त्रीसँग सरकार गठनका विषयमा शुक्रबार पनि कुराकानी हुने प्रचण्डले जानकारी दिए ।प्रचण्डले नयाँ संविधान निर्माणका लागि बाहिरै बसेर भए पनि सक्रिय सहभागिता जनाउन एमाले नेता नेपाललाई आग्रह गरेको खुलासा गरे । 'शान्तिप्रक्रियामा हामी, गिरिजाबाबु, माधवजी र नागरिक समाजको भूमिका उत्तिकै छ, त्यसकारण सहकार्य गरौँ भन्ने मैले प्रस्ताव राखेँ,' प्रचण्डले बुद्धिजीवीसँग भने, 'माधवजीले पार्टी नेतृत्व छाड्नै पर्ने थिएन । पार्टीको केन्द्रीय कमिटीको निर्णयअनुसार भावी सरकारमा जाने-नजानेबारे निर्णय हुन्छ भन्नुभो माधवजीले । हामी आशावादी छौँ ।' प्रचण्डले शान्तिप्रक्रिया पूरा हुन बाँकी रहेकाले सरकारमा सहभागी हुनुपर्ने प्रस्ताव राखेको पनि बताएका थिए । 'जनादेशलाई सम्मान गर्दै नैतिकताका आधारमा राजीनामा दिनुभो, यसमा मेरो केही भन्नुछैन,' एमाले नेता नेपालसँग प्रचण्डको भनाइ थियो, 'सबै मिलेर सरकार चलाऊँ, शान्तिप्रक्रियालाई पूर्णता दिऊँ भन्ने हाम्रो प्रस्ताव थियो ।' यसअघि बिहीबार बिहान गृहमन्त्री कृष्णप्रसाद सिटौलाले माओवादी अध्यक्ष प्रचण्ड र वरिष्ठ नेता डा. बाबुराम भट्टराईसँग प्रचण्डनिवासमा छलफल गरेका थिए ।अन्तर्क्रियामा वामबुद्धिजीवी पद्मरत्न तुलाधार, डा. सरोज धिताल, श्याम श्रेष्ठ, चैतन्य मिश्र, डा. भरत प्रधान, महेश्वरमान श्रेष्ठ, डा. शरद वन्त, डा. पिताम्बर शर्मा, कृष्ण पोखरेल, हेमबहादुर विष्ट, विष्णुहरि ढकाल, विनोद ढुंगेललगायत सहभागी थिए । यसैबीच माओवादी अध्यक्ष प्रचण्डले माओवादीका सहिद र बेपत्ता परिवारसँग छलफल गरेका छन् ।

राजा राख्ने पक्षमा छैनौं,'

माओवादी नेता रामबहादुर थापा बादलले राजाले दरबार छाड्न इन्कार गरे कानुनबमोजिम कारबाही गर्ने चेतावनी दिएका छन् । 'हामी यो वा त्यो रूपमा राजा राख्ने पक्षमा छैनौं,' उनले भने, 'अब राजालाई पशुपतिनाथले पनि बचाउने छैनन्, विनाक्षति उनी बिदा होऊन् भन्नेमात्रै हाम्रो चाहना हो ।' सम्मानजनक बिदाइका लागि माओवादीले राजा ज्ञानेन्द्रसँग भेट गर्न चाहेको उनले खुलासा गरे । 'हामी राजालाई खुला रूपमा भेट्दैछौं,' उनले भने । 'दुई तरिकाले गणतन्त्र कार्यान्वयन हुनेछ,' रिपोर्टर्स क्लबमा आइतबार बादलले भने, 'पहिले राजालाई नारायणहिटीबाट बहिगर्मनको आदेश दिन्छौं, त्यसपछि राष्ट्रप्रमुखको चयन गर्छौं ।' नागरिकको हैसियतमा पुगेपछि राजाले चाहे माओवादीको सदस्यता दिन सकिने पनि बादलले बताए । 'कम्युनिस्ट विचारधारा मान्नुपर्छ,' पत्रकारहरूको जिज्ञासामा उनले भने, 'राजालाई पनि भोलि हामी सदस्यता दिन तयार छौं ।' दुवै सेनाको एकीकरण गरेर नयाँ राष्ट्रिय सुरक्षानीति बनाइने र त्यसका आधारमा नयाँ सेना निर्माण हुने बादलले उद्घोष गरे । 'नयाँ राष्ट्रिय सेनाको आकार सानो हुनुपर्छ,' बादलले भने, 'आमजनतालाई फौजी तालिम र फौजी चेतना दिइनुपर्छ ।' प्रधानसेनापति रुक्मांगद कटुवालमाथि तत्काल कारबाही नहुने उनले बताए । 'कुनै कर्मचारीले अपराध गरेको छ भने प्रधानसेनापतिमाथि पनि कारबाही हुनुपर्छ,' उनले भने, 'तर, सेवाअवधि पूरा गर्न पाउनुपर्छ ।' माओवादीको नेतृत्व र सबै अग्रगामी शक्तिहरूको संयोजनमा संयुक्त अन्तरिम सरकार निर्माण हुनुपर्ने उनको भनाइ थियो । राष्ट्रिय हितमा नरहेका १९५० को नेपाल-भारत सन्धिलगायत असमान सन्धिको पुनरावलोकन गरी नयाँ आधारमा नयाँ सन्धि-सम्झौता गर्नुपर्ने पनि बादलको भनाइ थियो । नेपाली सेना र माओवादी सेनाबीच एकीकरण नभएसम्म राष्ट्रसंघीय नेपाल मिसन अनमिन आवश्यक रहेको उनको भनाइ थियो । 'दलहरूबीच सहमति भए अनमिनलाई बिदा दिन पनि सकिन्छ,' उनले भने, 'तर, अहिले नै हटाइहाल्ने बेला भएको छैन